ខេត្តកំពង់ចាម ៖ វគ្គបណ្ដុះបណ្ដាលគ្រូបង្គោលសម្រាប់បង្រៀនតាមប្រព័ន្ធអេឡិចត្រូនិក នៅគ្រឹះស្ថានបណ្ដុះបណ្ដាលគ្រូ ដែលត្រូវបានរៀបចំឡើងដើម្បីពង្រឹងសមត្ថភាពគ្រូបង្រៀនលើបច្ចេកទេសក្នុងការបង្រៀនតាមបែបថ្មី ដើម្បីលើកកម្ពស់ការអប់រំបែបឌីជីថល សម្រាប់ការរៀន និងបង្រៀន ដែលជាតម្រូវការដ៏ចាំបាច់ខណៈដែលគ្រឹះស្ថានសិក្សានានាត្រូវបានបិទទ្វារ ស្របតាមតាមចក្ខុវិស័យរបស់ក្រសួងអប់រំ យុវជន និងកីឡា និងរាជរដ្ឋាភិបាលកម្ពុជា ក្នុងការប្រែក្លាយប្រទេសទៅជាប្រទេសដែលមានសេដ្ឋកិច្ចបែបឌីជីថល ។
កាលពីនៅរសៀលថ្ងៃច័ន្ទ ទី១៥ ខែមិថុនា ឆ្នាំ២០២០នេះ ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញអមដំណើរ ឯកឧត្ដមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអញ្ជើញចូលរួមបើកវគ្គបណ្ដុះបណ្ដាលគ្រូបង្គោលសម្រាប់បង្រៀនតាមប្រព័ន្ធអេឡិចត្រូនិក នៅគ្រឹះស្ថានបណ្ដុះបណ្ដាលគ្រូ ដែលត្រូវបានរៀបចំឡើងដើម្បីពង្រឹងសមត្ថភាពគ្រូបង្រៀនលើបច្ចេកទេសក្នុងការបង្រៀនតាមបែបថ្មី ដើម្បីលើកកម្ពស់ការអប់រំបែបឌីជីថល។
ជាមួយគ្នានោះដែរ ឯកឧត្ដមបណ្ឌិតសភាចារ្យ រដ្ឋមន្ត្រី និងឯកឧត្តមអភិបាលខេត្ត បានអញ្ជើញចុះពិនិត្យការរៀន និងបង្រៀនពីចម្ងាយ ព្រមទាំងបានសំណេះសំណាលជាមួយគណៈគ្រប់គ្រងមជ្ឈមណ្ឌលគរុកោសល្យភូមិភាគកំពង់ចាម និងសាលាគរុកោសល្យ និងវិក្រឹតការខេត្តកំពង់ចាម៕
