នៅរសៀលថ្ងៃ ព្រហស្បតិ៍ ១៥កើត ខែអស្សុជ ឆ្នាំឆ្លូវ ត្រីសក័ ពុទ្ធសករាជ ២៥៦៥ ត្រូវនិងថ្ងៃទី២១ ខែតុលា ឆ្នាំ២០២១ ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលសន្តិសុខ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអញ្ជើញចូលរួមកិច្ចប្រជុំតាមរយៈប្រព័ន្ធវីដេអូពីចម្ងាយ ក្នុងកម្មវិធីបើក “សន្និសីទនគរបាលអន្តរជាតិឆ្នាំ ២០២១” (International Police Summit 2021) ។
កិច្ចប្រជុំខាងលើរៀបចំឡើងដោយទីភ្នាក់ងារនគរបាលជាតិកូរ៉េ ដោយមានការអញ្ជើញចូលរួមពីតំណាងនគរបាល នៃបណ្ដាប្រទេសចំនួន៣០ (១៩ប្រទេសចូលរួមដោយផ្ទាល់ និង ១១ប្រទេសចូលរួមតាមរយៈអនឡាញ) និងស្ថាប័នអន្តរជាតិចំនួន ០៤ (Interpol, Aseanapol, UN និង IACP) ។
សន្និសីទក្នុងឆ្នាំនេះ ត្រូវបានរៀបចំឡើងជាវេទិកាដល់ថ្នាក់ដឹកនាំនគរបាល នៃបណ្ដាប្រទេសទាំងអស់ដើម្បីពិភាក្សា និងចែករំលែកបទពិសោធន៍គ្នាទៅវិញទៅមក អំពីបញ្ហាប្រឈម ការប្រែប្រួលចំពោះការងារនគរបាល និងដំណោះស្រាយដើម្បីឆ្លើយតបទៅនឹងបញ្ហាទាំងនោះ ក្នុងបរិបទនៃវិបត្តិជំងឺរាលត្បាតសកលកូវីដ-១៩៕
