ខេត្តកំពង់ចាម ៖ នៅរសៀលថ្ងៃចន្ទ ទី២៥ ខែឧសភា ឆ្នាំ២០២០ លោកជំទាវ ប៉ាង ដានី អភិបាលរងខេត្ត តំណាង ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញចូលរួមក្នុងពិធីជួបសំណេះសំណាល និងចែកអំណោយមនុស្សធម៌ជូនបងប្អូនពលករ ពលការីនីដែលត្រឡប់មកពីបរទេស នៅបណ្ដាភូមិក្នុងឃុំព្រែកកក់ ស្រុកស្ទឹងត្រង់ ចំនួន២០គ្រួសារ។
ដោយមានការចូលរួមពីមន្ទីរការងារ និងបណ្តុះបណ្តាលវិជ្ជាជីវ:ខេត្ត, មន្ទីរសង្គមកិច្ច អតីតយុទ្ធជន និងយុវនិតិសម្បទាខេត្ត តំណាងអង្គការ (ILO) អាជ្ញាធរស្រុកស្ទឹងត្រង់ និងឃុំព្រែកកក់។
ក្នុងឱកាសនោះលោកជំទាវ បានពាំនាំការសាកសួរសុខទុក្ខពីសំណាក់ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ដែលតែងតែគិតគូរពីសុខទុក្ខរបស់បងប្អូនប្រជាពលរដ្ឋ ពិសេសបងប្អូនពលករ ពលការីនីដែលទើបនឹងត្រឡប់មកពីបរទេសក្នុងអំឡុងពេលនៃការរីករាលដាលនៃជម្ងឺកូវីដ១៩។
លោកជំទាវ បានណែនាំដល់បងប្អូន មិនត្រូវធ្វើចំណាកស្រុកដោយខុសច្បាស់, ការធ្វើចំណាកស្រុកដោយស្របច្បាប់ នឹងទទួលបានអត្ថប្រយោជន៍ស្របច្បាប់ កាត់បន្ថយហានិភ័យផ្សេងៗ។ ជាមួយគ្នានេះ លោកជំទាវ បានអំពាវនាវដល់បងប្អូនទាំងអស់ឲ្យមានការប្រុងប្រយ័ត្នខ្ពស់ចំពោះជម្ងឺដ៏កាចសាហាវនេះ និងចូលរួមទាំងអស់គ្នាក្នុងការបង្ការ និងទប់ស្កាត់ការរាតត្បាតនៃជម្ងឺកូវីដ១៩ ដោយត្រូវអនុវត្តន៍តាមការណែនាំរបស់ក្រសួងសុខាភិបាល ដោយលាងសំអាតដែ ប្រើប្រាស់ម៉ាស់ ឬក្រម៉ាឲ្យបានត្រឹមត្រូវ និងថែរក្សាសុខភាព អនាម័យ និងគម្លាតសុវត្ថិភាពជាចាំបាច់។
សម្រាប់បងប្អូនដែលទើបនឹងត្រឡប់មកពីបរទេសត្រូវដាក់ខ្លួនឲ្យនៅដាច់ដោយឡែកពីក្រុមគ្រួសាររយៈពេល១ថ្ងៃ និងត្រូវតាមដានសុខភាពជាប្រចាំបើមានករណីសង្ស័យត្រូវទៅមណ្ឌលសុខភាព ឬមន្ទីរពេទ្យដែលនៅជិតផ្ទះ។
គួរបញ្ជាក់ដែលថា ដោយសហការជាមួយមន្ទីរការងារ និងបណ្តុះបណ្តាលវិជ្ជាជីវ:ខេត្ត អង្កការ (ILO) បានផ្តល់អំណោយមនុស្សធម៌ជូនដល់ប្រជាពលរដ្ឋ ពិសេស ពលករ ពលការីនី ដែលទើបនឹងត្រឡប់មកពីបរទេស ចំនួន៣០គ្រួសារដោយក្នុង០១គ្រួសាររួមមានអង្ករ២០គីឡូ ទឹកស៊ីអ៊ីវ ១យួរ ប្រេងឆា១ដប ត្រីខ១យួរ សាប៊ូ៤ដុំ ក្រមា ០១ អាវកូនក្មេង ១កំផ្លេ និងថវិកា ៤០,០០០រៀល៕
